IMF Ya Nemi Tinubu Ya Tausaya Wa Talakawan Najeriya

          Daga Bello Usman.

Asusun bada Lamuni na Duniya (IMF), ya buƙaci gwamnatin Najeriya ta bawa ɓangaren rage wa talakawan ƙasar raɗaɗi muhimmanci.

Wakilin IMF a Najeriya, Dokta Christian Ebeke ne buƙaci hakan a yayin da yake tattaunawa da gidan talabijin na Arise a jiya, a dai-dai lokacin da ake ci-gaba da muhawara a kan ƙarin farashin man fetir a ƙasar.

Toh sai dai kuma ya ce har yanzu ba’a kai farashin man fetir ɗin asalin farashinsa na kasuwa ba, wanda hakan ke nuna cewa za’a ƙara farashin a nan gaba kamar yadda jaridar Vanguard ta kalato.

Idan ba’a manta ba, shi ma kamfanin NNPCL na Najeriya ya bayyana irin wannan matsayar a baya.

Babban jami’in na IMF ya bayyana damuwarsa a kan irin wahalar da ƴan Najeriya suke ciki, a sanadiyar wasu matakai da gwamnatin ƙasar ta ɗauka.

A cewar Ebeke, “Ina tunanin ƙarin farashin man ya zo ne a dai-dai lokacin da ƴan Najeriya suke cikin tsananin rayuwa.

“Domin Ƴan ƙasar suna fama da matsaloli da dama, kamar hauhawar farashin kayayyaki kamar abinci ga ambaliya da sauransu”.

A ƙarshe ya ce ƙara farashin man ya zo a dai-dai lokacin da tattalin arzikin ƙasar ke tangal-tangal, kuma ƴan Najeriya na cikin tsananin rayuwa.