KANSIEC Ta Rage Kuɗin Fom Ɗin Tsayawa Takara Na Zaɓen Ƙananan Hukumomin Kano

           Daga Bello Usman.

Hukumar zaɓe me zaman kanta ta jihar Kano (KANSIEC), ta rage Kuɗin fom ɗin tsayawa takara a zaɓen ƙananan Hukumomin Jihar dake tafe.

Shugaban hukumar Farfesa Sani Lawal Malumfashi ne ya sanar da hakan, a yayin taron masu ruwa da tsaki dangane da zaɓen ƙananan hukumomin jihar da za’a yi a wata me kamawa.

Ya ce rage Kuɗin ya biyo bayan umarnin da kotu ta bayar, dangane da yawan Kuɗin Fom ɗin da wasu jam’iyyun adawa suka ƙalubalanta a gaban ta.

A cewar Malumfashi, ” Yanzu hukumar zaɓen ta mayar da Kuɗin Fom ɗin takarar a matakin Shugaban ƙaramar hukuma da mataimakinsa naira miliyan 9 maimakon naira miliyan 10, yayin da kuma takardar tsayawa takarar kansila aka maida shi naira miliyan 4 maimakon naira miliyan 5 da yake a baya”.

Adan haka ne ya ce shirye-shiryen hukumar ya kammala na fara siyar da Fom ɗin daga ranar Litinin mai zuwa wato 15 ga watan Satumbar nan da muke ciki.

A ƙarshe hukumar ta yaba wa jam’iyyun siyasa bisa yadda suke bai wa hukumar haɗin-kai musamman babbar jam’iyyar adawa a nan Kano ta APC, bisa amincewa da shiga zaɓen na ƙananan hukumomin jihar, wanda zai gudana a ranar Asabar 26 ga watan Oktoba mai zuwa.