Ambaliyar Maiduguri : Gwamnatin Jihar Kano Ta Bada Tallafin Naira Milyan Ɗari Ga Waɗanda Iftila’in Ya Shafa

       Daga Bashir Gasau.

 

Gwamnatin Jihar Kano ta bada tallafin Naira Milyan ɗari, ga waɗanda iftila’in ambaliyar ruwa ya shafa a Maidugurin Jihar Borno.

Tawagar Gwamnatin Kanon ƙarƙashin jagorancin Kwamishinan yaɗa Labarai, Baba Halilu Dantiye ne suka miƙa takardar Cakin Kuɗin ga Gwamnan jihar Borno, Farfesa Babagana Umara Zulum a yayin ziyarar jajen da suka kai jihar.

A saƙon Gwamnan Kano Injiniya Abba Kabir Yusif ga waɗanda iftila’in ya shafa, ya bayyana lamarin a matsayin wata Jarrabawa da suke buƙatar cikakkiyar gudunmawar daga kowanne ɓangare.

Adan haka Gwamnatin ta bada nata tallafin domin nuna sadaukarwa ga jihar Borno a wannan lokaci na tsanani da take ciki, harma ta yi fatan Allah ya kare faruwar hakan a nan gaba.

A nasa jawabin Gwamnan jihar Borno, Farfesa Babagana Umara Zulum ya yaba wa Gwamnatin Jihar Kano dama al’ummar jihar a bisa irin gagarumar gudunmawar da suka bayar, inda ya bada tabbacin bada tallafin ga waɗanda iftila’in ya rutsa dasu.

Zulum ya kuma bayyana irin wannan aikin tausayi a lokacin yanayi na tsanani, a matsayin abinda zai ƙara haɗa kan Jihohin Najeriya.

Wannan tallafi dai ya ƙara nuna irin daɗaɗɗiyar alaƙar ‘yan uwantaka dake tsakanin Jihohin biyu.

A ƙarshe Gwamnan Kano yayi addu’ar Allah ya jiƙan waɗanda suka rasa rayukansu a sakamakon ambaliyar, ya kuma bawa waɗanda suka jikkata lafiya.

Tawagar Gwamnatin Kano ta ƙunshi Kwamishiniyar kula da harkokin Jin-ƙai dama yaƙi da talauci, Hajiya Amina Sani, Mashawacin Gwamnan akan tsare-tsare da ci-gaban al’umma Dakta Danyaro Yakasai da dai sauransu.